வாழ்வே ஒரு மந்திரம் - டாக்டர் பாலசாண்டில்யன்
தூங்கி எழுந்தவுடன்
கிடைத்த நல் உறக்கத்திற்கு
வீடிறங்கி நடந்த போது
மேனி வருடிய மெல்லிய தென்றலுக்கு
வீடு திரும்பியதும் மனைவி தந்த
கோப்பைத் தேநீரின் சுவைக்கு
மூச்சுப் பயிற்சி செய்த போது
நுரையீரல் நுழைந்த தூய காற்றுக்கு
மனதார சொன்னேன் ஒரு மந்திர வார்த்தை !
இட்லியை சிற்றுண்டியாக உள்ளிறக்கிய போது சமயலறைக்கு
எனக்கு 'பை" சொல்லிப் புறப்பட்ட குழந்தைகள் பார்த்த போது என் ஆண்மைக்கு
வெளிக்கிளம்பி பாதம் பதித்து நடந்த போது பூமிக்கு
அவசர உதவி வண்டியின் சத்தம் கேட்ட போது என் உடலுக்கு
காதலுடன் தழுவிச் சென்ற ஜோடியைக் கண்ட போது மனைவிக்கு
என் பையில் நுழைத்து வைத்த காசுப்பை கணினி
மதிய உணவை ஸ்பரிசித்த போது பெற்ற கல்விக்கு
தெருக்கோடி வங்கிக்கிளை பெயர்ப் பலகை தெரிந்த போது எனது தொழில் ஆற்றலுக்கு
எனைக் கடந்து சென்ற கார் பைக் கவனித்த போது எனது குறையாத வசதிக்கு
எனை விட பருமனான பலரைக் கடந்த போது எனது உடல்வாகிற்கு
நல்லிசை கொண்டு சேர்க்கும் எனது காதுகளுக்கு
நாயர் கடை மசால் வடை வாசனை நுகர்ந்த எனது மூக்குக்கு
வணக்கம் வைத்து வண்டி திருப்பிய நண்பர்களுக்கு
மனதார சொன்னேன் அந்த மந்திர வார்த்தை !
அற்புத தினமென்று வாழ்த்திய அலுவலக நண்பருக்கு
அழகுப் புன்னகை வீசிய காரியதரசிக்கு
என் பணி நன்று எனப் பாராட்டிய மேலதிகாரிக்கு
மேசை மீது சிந்தாமல் டீ வைத்த சிறுவனுக்கு
மீண்டும் சொன்னேன் அந்த மந்திர வார்த்தை !
நல்லுணவால் நன்னீரால் வயிறு நிரம்பியது
காற்று நுகர்ந்து உயிர் வலுவானது
ஆரோக்கியம் நற்பணி காதல் அன்பு நட்பு
மரியாதை அங்கீகாரம் பாராட்டு மனநிறைவு
கேட்ட வரங்கள், குடும்பம் உறவு நட்பு வட்டங்கள்
நல்லோர் உதவிகள் செய்ய ஒரு பணி
சொல் பேச்சு கேட்க சில நபர்கள்
பாச மழை பொழிய மனைவி மக்கள்
வெற்றி கண்டு நெகிழும் பெற்றோர்
சுற்றிலும் நன்மைகள் தொடரும் நல வாய்ப்புகள்
தேடி வரும் பாராட்டுகள் அனைத்துக்கும்
அழகாய்ச் சொன்னேன் அதே மந்திர வார்த்தை !
சொல்லச் சொல்ல இன்னும் நன்மைகள்
பிரபஞ்சத்தின் நல்லாசிகள்
மனம் நிறையும் நல்லெண்ணங்கள்
மீண்டும் எடுத்துரைத்தேன் அதே வார்த்தை !
வேறென்ன 'நன்றி' என்பதுவே அவ்வார்த்தை !
திரும்பத் திரும்ப நான் சொல்ல
விரும்பியது எண்ணியது கேட்டது கேட்காதது
அனைத்தும் கிடைக்கப் பெற்றேன் !
மந்திரச் சொல்லே உனக்கும் நன்றி!
உன்னை உச்சரிக்கும் உதட்டும் நன்றி !
